រាជធានីភ្នំពេញ៖ លោកឧបនាយករដ្ឋមន្រ្តី កើត រិទ្ធ រដ្ឋមន្រ្តីក្រសួងយុត្តិធម៌ បានដឹកនាំធ្វើសន្និសីទសារព័ត៌មានមួយដោយផ្ទាល់ នារសៀលថ្ងៃទី២៦ ខែមិថុនា ឆ្នាំ២០២៤ នេះ ជុំវិញករណីឃាតកម្មដែលប្រព្រឹត្តដោយជនល្មើសឈ្មោះ ស្រី ស៊ីណា។

គួរបញ្ជាក់ថា នៅក្នុងករណីឃាតកម្មដ៏ឃោរឃៅនេះ សម្តេចមហាបវរធិបតី ហ៊ុន ម៉ាណែត នាយករដ្ឋមន្រ្តីនៃព្រះរាជាណាចក្រកម្ពុជា បានផ្ញើសាររំលែកទុក្ខដល់ក្រុមគ្រួសារនៃជនរងគ្រោះ ហើយសម្តេចបានណែនាំ និងប្រគល់ភារកិច្ចឱ្យលោកឧបនាយករដ្ឋមន្ត្រី កើត រិទ្ធ បន្តតាមដានដោយយកចិត្តទុកដាក់លើការអនុវត្តច្បាប់ចំពោះករណីនេះ ដើម្បីធានាថា ច្បាប់ ត្រូវបានអនុវត្តដោយតឹងរ៉ឹង ម៉ឺងម៉ាត់ និង ដោយត្រឹមត្រូវទៅតាមខ្លឹមសារនៃច្បាប់ ក្នុងការផ្តល់យុត្តិធម៌ដល់ជនរងគ្រោះ និង ក្រុមគ្រួសារ។

លោកឧបនាយករដ្ឋមន្រ្តី កើត រិទ្ធ បានថ្លែងក្នុងសន្និសីទសារព័ត៌មាននារសៀលថ្ងៃទី២៦ ខែមិថុនានេះថា លោកគឺជាអ្នកទទួលខុសត្រូវមុនគេបង្អស់ចំពោះមុខថ្នាក់ដឹកនាំកំពូល ទៅលើការអនុវត្តច្បាប់ក្នុងករណីឃាតកម្មប្រព្រឹត្តដោយជនល្មើស ស្រី ស៊ីណា។ លោក កើត រិទ្ធ ថ្លែងថា៖ "ខ្ញុំទំនងជានឹងមិនអាចនៅក្នុងវិស័យយុត្តិធម៌ទៀតទេ ប្រសិនបើក្នុងករណី (ឃាតកម្មដោយជនល្មើស ស្រី ស៊ីណា) ជនល្មើសមិនត្រូវបានផ្តន្ទាទោសដាក់ពន្ធនាគារ ឬប្រសិនបើជនល្មើសត្រូវបានដាក់ទោសត្រឹម ២ ឬ ៣ឆ្នាំ ពោលគឺខ្ញុំជាអ្នកទទួលខុសត្រូវមុនគេ គឺអាចនឹងដើរចេញតែម្តង!"៕